Sekretari i Thesarit të SHBA-së, Scott Bessent, është larguar nga banesa e tij dhe është vendosur në një bazë ushtarake, pas kërcënimeve ndaj jetës së tij nga Irani. Lajmi është raportuar nga gazeta amerikane “The New York Times”, e cila citon burime të njohura me çështjen.
Sipas raportimit, vendimi për t’u larguar nga shtëpia është marrë për arsye sigurie, ndërsa ende nuk dihet se sa serioz është niveli i kërcënimit ndaj zyrtarit të lartë të administratës së presidentit Donald Trump.
Shqetësimet për sigurinë e zyrtarëve amerikanë janë shtuar pasi Irani ka intensifikuar përpjekjet për të shënjestruar personelin ushtarak dhe përfaqësuesit e qeverisë amerikane. Një dokument i brendshëm i një zyrtari të administratës Trump, përgjegjës për çështjet e inteligjencës dhe sigurisë kombëtare, i siguruar nga Reuters në tetor, paralajmëronte se planet iraniane për sulme ndaj amerikanëve kishin arritur në faza të avancuara.
Megjithatë, sipas “New York Times”, administrata Trump vlerëson se aftësitë e Iranit për të organizuar sulme në shkallë të gjerë në territorin amerikan apo në vende të tjera janë mjaft të kufizuara. Nga ana tjetër, Teherani ka mohuar vazhdimisht se ka plane për të sulmuar zyrtarë apo qytetarë amerikanë në territorin e SHBA-së.
Departamenti i Thesarit nuk iu përgjigj menjëherë kërkesës së Reuters për një koment lidhur me raportimin.
Scott Bessent është një prej figurave kryesore të strategjisë ekonomike të administratës Trump kundër Iranit, duke qenë në krye të fushatës së ashtuquajtur të “presionit maksimal”, përmes sanksioneve dhe masave ekonomike ndaj Republikës Islamike.
Zhvillimet vijnë në një kohë kur lufta, e nisur më 28 shkurt me sulmet e SHBA-së dhe Izraelit ndaj Iranit, ka shkaktuar pasoja të rënda në rajon. Bombardimet në Iran dhe ofensiva izraelite në Liban kanë shkaktuar mijëra viktima dhe kanë detyruar miliona njerëz të largohen nga shtëpitë e tyre.
Mes viktimave të sulmeve të para ishin edhe zyrtarë të lartë iranianë, përfshirë Udhëheqësin Suprem të Iranit, Ali Khamenei.
